W.Rashad Page

الذكرى الخامسة لاعز الناس ... حبيبى يا غالى

2011-11-27T22:20:00.001+02:00

حبيب قلبى الغالى... والدى العزيز الغائب الحاضر

.............وحشــــتنا جدا يا أبويــــا

زى النهارده من خمس سنين ...وعند آذان فجر الثلاثاء 28-11-2006 ، لبيت نداء ربك :" يأيتها النفس المطمئنةارجعى الى ربك راضية مرضية فأدخلى فىعبادى وأدخلى جنتى " صدق الله العظيم . ومازلنا ندعو الله سبحانه وتعالىالعلى القدير أن تكون من أهل جنته وأن يجعل عملك الصالح خير أنيس و جليس لك فىقبرك وأن يوسعه لك مد بصرك وأن يفتح عليك فيه بنور من الجنة وأن يريك عز وجل مكانكفى الجنة فتطمأن روحك ، وأن يبدلك أهلا خيرا منا ، فهو ولى ذلك والقادر عليه .

وهانحن نأمل فى الله خيرا لك ولكل أمواتنا المسلمين ، فلقد كنت أنت ممن أختصهم الله بأن يكونوا ممن يقضون بين الناس بالحق ، نعم يا أبى فلم أعد أتعجب وأنا أسمع ممن أعرفهم ومن لاأراهم فى حياتك وهم يثنون عليك وعلى علمك بعملك وحبك وبحثك ومؤلفاتك فى كتبالقانون للوصول الى الحقائق وإرساء العدل بين المتخاصمين فى ساحات المحاكم ،وماكنت فى هذه الأثناء إلا أن أدعو الله عز وجل أن يجعل عملك الصالح وقولك الحق(بإذن الله ) خير مؤنس لك فى وحشة القبر .

أبى العزيز الغالى ، نفتقدك.. نفتقدك .. نفتقدك

فلقد كنت أنت بمثابة عمودنا الفقرى الذى يشد منأذرنا ويقوى همتنا، فكم صعبة هى الحياة ، نعم صعبة ، فانا أحاول أن أتخيل أولادىعند مماتى ، هل سأنجح فى تربيتهم على المثل والمبادئ كما علمتنا ؟ ، وكيف ياأبى ،لقد تغير الحال وتبدلت الافكار و الاخلاق و وتباينت مستويات القياس وضاعت المثلالعليا و راحت القدوة ، صدقنى لم أبالغ ، بالفعل بات من الصعوبة علينا ان نربى أولادنا،أو حتى ننجح فى أن نضمن لهم قسط من العلم يمكنهم من التنافس على مهنة محترمة وشريفة .

تصور يا أبى العزيز الغالىوالحبيب الى روحى ، ولى العهد "محمد" ابنى الكبير وصل الآن الصف الثانىالاعدادى (13 سنة ) يا بابا ، والاستاذ" نور الدين" فى الصف الخامس الابتدائى( 10 سنين ) والليدى" ملك" فى كى جى2( 5.5 سنين) ، فبدأت أسال ممكنيطلعوا يشتغلوا ايه ؟؟ ، وأدركت أنه أصعب سؤال هذه الايام .. فلم يعد أحد يدرى ماالصورة التى ستكون عليها مصر؟ ، أو بالأحرى ما الذى ممكن أن يحدث فى مصر خلالأسبوع واحد ؟؟ ، فلقد تأزمت المواقف وزاد الاحتقان فى البلاد ، وأصبحت أنا ممنيندمون على بقائهم فى هذه البلد ، فكما عودتنا أنت أن نتخذ العبرة والقدوة دائمامن العناصر الناجحة والواعدة والمبشرة بمسقبل مشرق ، فلم أجد من جيلى والجيلالسابق الا من هم خارج البلاد .

فكل ما أتذكرك وأنت تعرض علىبعد النجاح فى الثانوية العامة أن ألتحق بكلية الحقوق ، وأنا أرفض كى لا أكون ممنيستفيدوا بالإمتياز والإلتحاق بالنيابة لكونهم من أبناء رجال القضاء ، فكم كنتديمقراطى معى لأقصى درجة ، وأنت تدعو الله لى التوفيق فى أى مجال وأنت تعلم أنالمستقبل بيدى الله .

كم كنت عظيما وأنت تكررالمشهد ذاته وتترك الاختيار لأخى "خالد" بالالتحاق بكلية الهندسة ، كنانتوقع وقتها أن من يكدح ويعرق ويبذل قصارى جهده فى ميادين عمله وعلمه سيكون منناجحى جيله ويستطيع أن يوفرلأسرته الصغيرة قدر بسيط من الأمن والامان والستر وأساسلمستقبل شريف ، لم يكن لديك الكثير من أساليب هذا الزمان لنتعلم منك الحنجلةوالفهلوة واللف والدوران وتظبيط رؤسائنا والتملق والتسلق والحاجات اللى بتعمل منأصحابها كيانات وأصحاب مراكز مادية مليانة وساعتها بيتقال عليها محترمة..!!

تعرف انه قامت فى مصرنا ثورةكبيرة على النظام ، أتمنى من الله أن تكون على هذه العادات و السلوكيات والمبادئ السيئةوليست على الأشخاص و بس ... وأعدك أن كان فى العمر بقية ، هأحكيلك اللى هيحصلناواللى لسه قلقنى أوى يا أبويا العزيز ...رحمك الله وستظل دوما لنا الغائب الحاضر ..

ابنك اللى بيحبك ويقدرك / وليد رشــاد

نحن قوم يجتمع ويتوحد على الكراهية ، و الحب يفرقنا ويشتتنا

2011-11-17T14:45:00.001+02:00

لاسف هذا ما تثبته هذه الايام العصيبة والعصبية فى مصرنا الحبيبة ، تجمعنا وتوحدت صفوفنا على كراهية مبارك ونظامه و حاشيته ، ولم ينجح حب مصر فى ان يحافظ على تجميعنا ، بل بات كل منا ينزوى و يختلف ويفكر ويزايد على الاخر ، لم ننجح ان نجتمع على حب مصر واحدة ، كل منا له رؤية مختلفة ومخالفة للاخر فى حبه ، فتاهت وجهتنا و تشتت قوتنا .

نكاد نعكر صفو فرحتنا باول انتخابات برلمانية نزيهة تحترم صوت الانتخابى للمواطن المصرى واداميته وحقه الطبيعى فى ممارسه حقه الانتخابى دون زيف أو شراء لصوته ، نكاد نقتل الامل بداخلنا قبل ان يولد ... نعم سنجهض حريتنا بأيدينا وعن عمد .

نحن مقبلين على اول مراحل بناء الدولة المصرية التى طالما تداعب خيال المصريين الشرفاء -وما أكثرهم - فى بلدنا الحبيبة.

هناك سؤال يلح على تفكيرى فيما يدور حولى من صراعات ، حزب الحرية والعدالة الحزب السياسى لجماعة الاخوان المسلمين ، الاقرب ويكاد يكون الوحيد للفوز بأغليبية البرلمان المصرى الاول بعد ثورة الشباب ، لماذا لا ينحاز الى اغلبية الشعب المصرى فى مطالبه ، لماذا لا يتكاتف ويشارك الا اذا أراد ان يوجه رسالة ما الى المجلس العسكرى خاصة فيما يتعلق بالانتخابات البرلمانية مثل - اذا : علا الصوت بالدستور أولا - أو اذا ما تدخل المجلس العسكرى وتحاور مع من يرددوا لابد من وضع وثيقة حاكمة للدستور - وأخيرا اذا علا الصوت المطالب باحتمال مؤقت لتأجيل الانتخابات.

جمعة 18 نوفمبر وما أطلق عليها جمعة تسليم السلطة - هاهو حزب العدالة والحرية يلوح باحتمالية مشاركته مع بقية الاحزاب الاسلامية كورقة ضاغطة على المجلس العسكرى لتحاوره على وضع الوثيقة الحاكمة للدستور، لماذا لا نشارك جميعا فى هذه الجمعة ولكن تحت اسم جمعة طلب الامن والامان - نعم الامن والامان لكل المصريين الذين ذاقوا الخوب والرعب من عمليات السرقة تحت تهديد السلاح فى الشوارع والطرقات وعانوا من تصفيات الحسابات بين العصابات وعانوا الامرين من كثرة الاعتصامات والمطالبات المقبولة واللامنطقية ، كل هذا فى أسبوع واحد :

سوهاج : منطقة دار السلام والعراك الدائر بالاسلحة بين عائلتين لمدة 6 أيام
كفر الشيخ : وحرب الشوراع والخنادق و الحصار بين أهالى بلطيم ومنطقة سوق الثلاثاء
دمياط : وتظاهرة كل أهالى السناينة ودمياط ج لرفضهم مصنع موبكو التابع لاجريوم الشهير ( طوال 5 أيام

اليس هذا يوحى لزعماء حزب العدالة وغيره وغيرهم من التوحد والمشاركة مع كل أطياف الشعب الغلبان فى طلب أساسى وهو - الامن والامان أولا وثانيا وثالثا

الى كل من يحب ويعشق وله حلم فى مصرنا الجديدة ، فكر فى شعبها وبس - شارك ولكن فى جمعة "أمن وأمان " نطالب فيها جيشنا العظيم والباسل بفرض سيطرته بأى طريقة على كل أرجاء مصر سواء برجاله أم بأفراد الداخلية أم بنا نحن فى صورة جمعيات شعبية ولجان تعمل تحت أعين وحكم الحاكم العسكرى فى كل محافظة .

لن يهمنا المحاكمة عسكرية ام مدنية - بل نريدها عادلة وشفافة ، عشتها من 30سنة مدنية وشاهدت المجرم يلهو باقدارنا وارواحنا وأموالنا والسجون مليئة بالمظلومين.

الشعب يريدها جمعة / الامن والامان والعدل

بداية نقطة النظام الجديد فى مصر .. وأنا موافق و فرحان ومعنديش لسه " نقطة"

2011-09-13T00:49:00.001+02:00

السبت ١٠-٩-٢٠١١ : قرار منع الترخيص للقنوات الفضائية الجديدة- بعد أحداث جمعة تصحيح المسار
الاحد ١١-٩-٢٠١١ : التفتيش المفاجئ على قناة الجزيرة مباشر مصر واللى فيه نكتشف بعد٨شهور شغل انه ليس هناك ترخيص ، وبالتالى وقف البث فورا ، واستنادا لقرار أمس لا يمكن استخراج ترخيص عمل للقناة طبعا
الاحد ١١-٩-٢٠١١ : اعتذار قادة المجلس العسكرى و طلبهم تأجيل شهاداتهم فى محاكمة الرئيس السابق و أعوانه بسبب تداعى الامن والامان فى البلاد
الاحد ١١-٩-٢٠١١ : اعادة تفعيل قانون الطوارئ فى البلاد بعد تعديله ، نزولا لرغبة الداخلية اللى واخدة على خاطرها بعد أحداث ٩-٩-٢٠١١ ، واللى مش عارفة تشوف شغلها فى ظل اجراءات القانون العادى اللى مش بيساعده على ملاحقة المجرمين وحاملى السلاح .
وبالتالى ، بما ان هناك ثورة و دم شهداء وشباب قدم حياته من أجل التغيير للأحسن ، فمن حقنا أن نرى

ضبط الشارع المصرى ونهاية عصر العشوائية من تعدى على الطرق من أصحاب المحال والكافيهات والباعة الجائلين
محاسبة مثيرى الشغب وتعقب حاملى كل أنواع السلاح ، يعنى مش كل اتنين يختلفوا نرى السيوف والسنج والمطاوى ، وبعد شوية يطلع الفريق المهزوم بفريق جديد وياخد حقه بنفس الطريقة ومفيش شرطة.
سيولة المرور ومحاسبة كل المخالفين وحل مشاكل التوك التوك و الموتوسيكلات بتاعة استيراد النظام السابق بلا حساب ولاوضع نظم للترخيص.
ازالة كاملة لكل مظاهر التعدى على الاراضى الزراعية والاكشاك العشوائية التى تم زرعها فى أى مكان ، وازالة جميع المطبات الصناعية التى تم عملها من صاحب كل بيت أمام منزله ، وكذلك الاحجار والسلاسل من كل بيت لمنع وجود اى سيارة أمام بيت أهله بأعتباره اشترى الشارع لمجرد انه ساكن فى شقة أو حتى مالك عقار لكن مالقاش من البلد والمسئولين اللى يقول غلط .
أهلا ومليون مرحبا بأى قانون ونظام يحمى المواطنين و يصلح حالهم ويحميهم ويجعل منهم عطائين لهذا البلد ، مصرنا الحبيبة

أحداث 9-9-2011

2011-09-10T14:58:00.000+02:00

ما يطلق عليه - ثورة تصحيح المسار :

الحمد لله ان فيه اصلا مسار وان هناك من يريد ان يصححه ، والقارئ لكل ما حدث فى هذا اليوم ، يرى أن كل ما كان من شأنه البحث عن الاحتكاك مع الداخلية تحت أى مسمى - أمن مركزى -حراسة منشات-وزارة الداخلية نفسها ، اى حاجة تبع الداخلية ، البداية دار القضاء العالى بحثا عن الداخلية-السفارة الاسرائيلية بحثا عن الداخلية ولما كان هناك سور و حاجز جديد ، طيب وماله نكسره عندا فى المجلس العسكرى وممكن تطلع لنا الداخلية ، ولما خلص السور و انكسر ونزل العلم واتحرق وبرضه مفيش داخلية - نطلع السفارة وندخلها - طيب نطلع على وزارة الداخلية طيب نرمى طوب و حجارة -برضه مفيش فايدة ماردوش علينا - طب نولع لهم فيها - يوووه برضه مفيش - طب نرجع للسفارة طالما لقت استحسان عن باقى الشعب وبيشجعونا هناك - طب ما تيجوا نطلع على مديرية أمن الجيزة - أهى جنبنا مش بعيد - لاء تعالوا بسرعة الامن المركزى ظهر عند السفارة-طبعا لما بدأ السفير الاسرائليى فى الاستعداد للسفر وطلب الطائرة الخاصة والاخبار تناقلت على انه بيهرب بجلده وان الدنيا والعة فى ووزير الدفاع الاسرائيلى يتحرك دبلوماسيا مع امريكا - وتيجى الاوامر لسرعة ظهور الامن المصرى وانه بيحاول يرد على المتظاهرين وانه ماسك زمام الامور . يا ناس ، مين الغلطان فى حق هذا البلد - الداخلية اللى غصب عنها كان لازم تبعد عن الانظار فى هذا اليوم لانها مستهدفة من غضب الجماهير وطريفة تعاملها مع جمهور كرة فى مباراة ، ولا ادارة شئون البلد اللى خايفة تدير بحزم وتواجه لاحسن تزعل حد-سياسة المجلس العسكرى مثل حكومة شرف- نفس اللا روح - وكأن فهمهم لتسيير الاعمال يعنى - قضيها ، ودع الملك للمالك ، وخليها تسبح - لازم نواجه سلبياتنا - البلد مش تمشى زى زمان بجروحها و مشاكلها والا هنرجع تانى نقيضها وبس ومش هنتحرك من مكاننا من كتر مشاكلنا ، لن نبدع لن ننافس لن نتحرك للامام ، لابد من جراحة واستئصال كل ما ينغص حياتنا، سنتألم سننكوى - لكن سنشفى - ونعيش فى مرحلة النقاهة - وسنقوم أقوياء ، علينا ان نواجه - لا تترك القيادة والانتخابات هى التى تبدأ والا ستكون بمثابة زرع و صناعة زعيم ديكتاتورى جديد - هو بس اللى يقدر يدينا الامن والامان والهدوء والاستقرار فى العلاقات الخارجية على ايده - يااه ده احنا من غيره كنا مفيش - عايزينه معانا طول العمل .. كفاية بأه - هنعيده تانى.

قولى أنت .. مين فرحان بالثورة فى مصر ؟؟

2011-06-27T23:15:00.000+02:00

· الشباب اللى قاموا بالثورة حاسين انهم انضحك عليهم والناس كلها سرقوا ثورتهم.!!

· الاحزاب القديمة فشلت فى تجميع نفسها ولم شمل القدامى اللى زيهم و عمل ائتلاف مع الثوار الشباب ،والثوار بيقولوا لك الناس دى عايزين ينطوا الحبل ( أقصد ينطوا على ثورتنا ).!!

· الاحزاب الجديدة اللى بيحاولوا يظهروا على الساحة، مش عارفين يجتمعوا بالناس ولا يعملوا شعبية فى كام شهر بالاضافة للعجز فى التمويل المادى والاعلامى . !!

· حتى جماعة الاخوان المسلمين اللى باين انهم أكتر الناس استفادة من الثورة، اختلفوا على تقسيم المكاسب بينهم – مرة حزب وبس ومالناش فى الحكم –ومرة لاء ليه مايكونش أكتر من حزب ؟ - وهنا ينشق شباب الاخوان ويقولوا لك نشوف نفسنا بدل العواجيز اللى كاتمين على نفسنا ، ونقب بأه ونظهر- ومرة يستقيل نائب ويطرد آخرون من الجماعة علشان عايزين فرصة للتنافس على الترشيح لرئاسة الدولة .!!

· حتى الشباب اللى قاموا بالشرارة الاولى للثورة ، مش قادرين على الحوار فيما بينهم ومش عارفين يعملوا ائتلاف واحد يمثلهم - ( كل مجموعة شباب يقولوا لك لولا احنا ما قامت الثورة ).!!

· حتى الاستفتاء اللى فرحنا بيه ، وقلنا أول مرة نروح صناديق الانتخاب و الجيش شغل شرايط كاسيت وأغانى وطنية وطوابير وتصويرأصابع وكده – ولما طلعت النتيجة ، أختلفنا عليها وقلنا ماكناش فاهمين بننتخب ليه – وبنتخانق – الدستور أولا ... لاء ... الانتخابات البرلمانية أولا...!!

· حتى الطبقة المتوسطة والتحت متوسطة اللى فرحوا بالثورة – شغالين مطالب و اعتصامات واضراب عن الطعام ومش بعيد تبدأ حالات الانتحار و نولع فى نفسنا تانى ، خاصة أن حالات الهجرة الغير شرعية زى ما هى بل بتزيد كل يوم .!!

· حتى الجيش والمجلس العسكرى ، يقول لك عايز أرجع الثكنات بسرعة العبء ثقيل و المهمة صعبة.!!

· حتى الحكومات الانتقالية – تصريف الاعمال – مش عارفين لا يشكلوها ولا حد عايز ولا عارف يشتغل فيها – خايفين ياخدوا قرار أحسن يتحاكموا بعد شوية .!!

· حتى جهاز الشرطة بما فيه من شرفاء و ظلمة ، يقولك - كله كان فاسد و الداخلية وحدها بتدفع الفاتورة - (طب مين اللى بيقبض).!!

· حتى طلبة الثانوية العامة ، كانوا فاكرين هيوزعوا عليهم ورق اجابات فى لجان الامتحانات بدل من ورق الاسئلة – بمناسبة الثورة طبعا .!!

v أقول لك أنا مين اللى فرحان بالثورة :-

Ø كل اللى كان بيربط حزام العربية ، واللى كان بيرمى الموبايل من ايده لما يشوف عسكرى مرور .

Ø كل مستوردين الموتوسيكلات الصينى والهندى والتوكتوك ، اللى بيشتغل حلاوة ولا ترخيص ولا حاجة وبيمشى فى أية حتة فى البلد .

Ø كل سواقين الميكروباص والتاكسى الى يقفوا فى أى حتة وفى اى وقت وياخدوا الاجرة اللى هما عايزينها ويركبوا اللى يعجبهم.

Ø كل بائعى الارصفة ، أفرش وأبيع فى الحتة اللى على مزاجى وأقفل أى شارع حيوى المهم البيع والشراء - وعايز حد يتكلم .

Ø كل اللى بيمشى مخالف – ودول كتير قوى – وعكس الاتجاه فى أهم شوارع فى البلد وفى أى وقت وخصوصا فى عز النهار والزحمة.

Ø كل أصحاب الكافيهات و القهاوى البلدى – اللى طلعوا كل الكراسى بره فى نص الشارع – والزباين تحب كده – ترمى عربياتها فى بقية الشارع وتديها شيشة - نفسين فى حب الثورة.

يعنى من الآخر كده .. اللى فرحان بالثورة هما بس - اللى بيخافوا ومايختشوش.

يا خسارة دم الشهداء – لو كلامى ده صح

احنا بتوع الثورة المضادة

2011-06-24T16:19:00.001+02:00

اللى كان عامل ثورة عشان قمع الشرطة واستبداد وغطرسة الداخلية ، أهى الداخلية فى مصيبة ومش هتفوق منها تانى الا بجراحة استئصال.

واللى سخن أكتر ورفع مطالب الثورة الى اسقاط النظام ...، أهو وقع رأس النظام فى أشر اعماله وشايف أيام بيتمنى فيها الموت كل لحظة وربنا مش بيستجب للطاغية الظالم.

واللى حس أنها ماشية تمام وقال لك أخلص من أمن الدولة عشان نتحرر ونضمن اننا مانتمسكش تانى ، أهم اتبهدلوا وكرهوا اليوم اللى اشتغلوا فيه فى أمن الدولة وقطعوا شغلهم بايديهم وانكشفوا انهم كلاب حراسة للسلطة مش حماة الشعب والسهرانين لراحته وحماية حقوقه.

واللى قال لك بس انا عرفت المشكلة فين ، المشكلة فى فساد الاعلام المزور للحقائق واداة السلطة الفاسدة لقلب الحقائق وتزوير ارادة الشعب،أهم غيروا العديد من هذه القيادات وبيحاكموا الباقى.

واللى قال لك لازم من محاكمة الرئيس وأعوانه وعايزين فلوسنا وهو ده اللى احنا عايزينه وهو ده الحل اللى هيريح البلد ويظبطها ، كل ده بيحصل وعايشينه.

لكن السؤال .. احنا عملنا ثورة عشان كل اللى فات ده ؟؟؟ طبعا لاء ،، كل دى كانت خطوات لابد منها ، لكن الثورة الحقيقية على الوضع اللى احنا وصلنا ليه مع النظام السابق ، وعشان كده لازم نغيره ونحط نظام جديد نمشى عليه ومعاه عشان نغير أحوالنا ونعمل مصر اللى فى خواطرنا و اللى عايزينها فى أحسن حال و مكانة ويرجع المصرى مثال جيد ورائع ونافع وفعال فى كل المجالات والبلاد الثورة دى ثمنها غالى فيها دم شهداء من خيرة شباب البلد ، شباب فى عمر الزهور 18و20سنة قدموا عمرهم ودموع وحسرة قلوب ذويهم من أجلى انا وانت و كل مصرى لسه على ترابها.

، علشان كده ماينفعش انا وانت نقوم بهذه الثورة المضادة من أجل احباط ما وصلنا اليه

ايوه انت مستغرب انك من قائدى هذه الثورة المضادة ، لاء ما تسأل نفسك ليه :-

· التعديات على الاراضى الزراعية الاف الافدنة فى الجمهورية-أوعى تقول انها قلة مندسة أو شواذ- ليه فيه مهندس خطط واشرف على التجريف و البناء وفيه مقاول و انفار نفذوا وفيه مصانع تعلم أين يذهب الاسمنت والحديد والطوب - كلنا مشاركون

· التعديات على كل الطرق داخل كل المدن المصرية من كل الكافيهات اللى طلعوا الكراسى و الترابيزات والشيش داخل الشوارع عشان يعمل منظر وقال ايه هواء طلق وحرية بأه- وأوعى تقول لى قلة قليلة - ليه ؟؟ مش هم دول الشباب اللى قاعدين على الكافيهات دى هم نفسهم اللى كانوا فى الثورة وكانوا فى التحرير وكانوا بيهتفوا ويجروا وبيشيل زميله اللى انصاب أو مات -ايه اللى حصل خلاص كده عمل ثورته وخلص وقاعد يرتاح وسعيد باللى وصله؟؟؟ ايه الشباب ده مش شايف اختناق المرور بسببه ومش شايف الباعة اللى فرشوا واستحلوا الشوارع عشان يعرضوا بضاعتهم والمحلات اللى بتدفع ايجارات ومرتبات وضرايب مش مهم يولوعوا وتزيد الاحتكاكات بينهم وتقوم المعارك وتتكسر محلاتهم وبضاعتهم ولازم يسكتوا- ليه ؟؟ مش البائعين دول اللى كانوا معانا فى الثورة وايديهم فى ايدينا -ايه اللى حصل كان طالع الثورة عشان يعمل لنفسه كشك فى أهم حتة حيوية فى الشارع ويقف يبيع فيها ومحدش يقدر يكلمه وبس؟؟؟

· كل بيت فى كل بلد وقرية على الطريق السريع عمل لنفسه مطب صناعى على مزاجه - الله - عايز يحمى اولاده وبيته - طب هم مين اللى اتعدى على مين الطريق اللى جه جنب بيتك ولا انت اللى جرفت الارض الزراعية و بنيت البيت على الطريق و عملت لك ماركت وسبت شغلتك - مش انت يا فلاح مصر الخير اللى كنت معانا وكنت بتسب وتلعن فى النظام والفساد والتعدى على الحريات؟؟؟

كلنا نتعدى على حريات بعض- أخشى أن اقول - كلنا تبع النظام الفاسد -بل كلنا من اخراجه وصناعة الهواء الفاسد الذى تنفساه وجرى فى دمائنا

تعالوا نسال احنا كنا بثور على ايه ؟؟؟ و علشان ايه ؟؟؟

أرجوكم لابد نذكر أنفسنا دوما -احنا نستاهل الثورة ولا رجالة الثورة المضادة؟؟؟؟

يوم ميلادك فى قلبى يا غالى

2008-09-07T14:05:00.003+02:00

قبل اي حاجة حبى و اشتياقى ليك بيزيد ، زي النهارده من 74 سنة { 1934 } كان يوم ميلادك ياجميل ، وكان اخر مرة تسمع مننا كل سنة و انت طيب يا غالى كان 7-9-2006 وساعتها حبيبى كان بيقول النهارده تممت 72 سنة محدش يقول { ربنا يخليك او ربنا يديلك طولة العمر لاء ،قول ربنا يبارك لك ف عمرك }، ابى الغالى ،بعدها بشهرين يعنى ف 28-11-2006 ،سبتنا كلنا و ارتقيت للرفيق الاعلى اللى عز و جل كنت بتحبه اوى و كنت دايما تشكره ع نعمه علينا ،انا النهارده بأدعى لك تكون فى منزلة عالية و كبيرة عند ربنا سبحانه و تعالى ، و أطمئن علينا كلنا كويسين و الحمد لله و مفيش اى تطورات غير ان تامر ربنا رزقه بولد سماه سعود ، و بقية احفادك بيكبروا الحمد لله ، انت وحشتنا كلنا اوى اوى
يا بابا.

يوم ميلادك فى قلبى يا غالــى

2008-09-07T13:56:00.000+02:00

قبل اي حاجة حبى و اشتياقى ليك بيزيد ، زي النهارده من 74 سنة { 1934 } كان يوم ميلادك ياجميل ، وكان اخر مرة تسمع مننا كل سنة و انت طيب يا غالى كان 7-9-2006 وساعتها حبيبى كان بيقول النهارده تممت 72 سنة محدش يقول { ربنا يخليك او ربنا يديلك طولة العمر لاء ،قول ربنا يبارك لك ف عمرك }، ابى الغالى ،بعدها بشهرين يعنى ف 28-11-2006 ،سبتنا كلنا و ارتقيت للرفيق الاعلى اللى عز و جل كنت بتحبه اوى و كنت دايما تشكره ع نعمه علينا ،انا النهارده بأدعى لك تكون فى منزلة عالية و كبيرة عند ربنا سبحانه و تعالى ، و اطمئن علينا كلنا كويسين و الحمد لله و مفيش اى تطورات غير ان تامر ربنا رزقه بولد سماه سعود ، و بقية احفادك بيكبروا الحمد لله ، انت وحشتنا كلنا اوى اوى
يا بابا.

اصحاب العقول طلعوا معاش

2008-06-11T00:27:00.003+03:00

لم يعد هناك اية معايير للنجاح ، و لم يعد هناك اسبا ب او خطوات محددة نحو النجاح ، انظر حولك تغير كل شىء ، ليس هناك ثوابت لاى شىء ، ولم نعد نتفق على شىء ، هل هذا صحى و ايجابى ؟ ، المسئلة دى عايزة نقطة نظام ، صدقنى يا صاحبى لو اولادنا تاهوا فده حيكون بسبب اننا مختلفين حتى على ابسط الثوابت اللى حوالينا ، فيه حاجة جديدة علينا الايام دى محتاجة منا نحاول نشوف اسبابها ، انا ملاحظ ان موسم الاجازات خلص ، ودلوقتى تلاقى شباب فى سن صغير عقلة طلع معاش مبكر ، بص حواليك حتلاحظ زيادة اعداد المختلين عقليا فى الشوارع ، فكر و رد عليا

انا محتار و عقلى طار

2008-05-03T01:37:00.001+03:00

الطبيعى ان الاسعار تقل لما الناس ما بتشتريش عشان الفلوس قليلة و اللى جاى ع اد اللى رايح، لكن اسالوا اسعار الاراضىي تطلع ازاى و الشقق وصلت لفين و لو قدرت توصل لايرادات احدى شبكات المحمول ف مصر حتفاجئ ان اكتر من اتنين تلاتة مليون يوميا ، اه والله ، عشان كده ، انا بدأت اصدق ان البلد فيها فلوس و فلوس كتير قوى لكن مفيش عدالة ف التوزيع، احنا اللى ما بنعرفش نصرف ،،،،وعجبى

حكمة اليوم

2008-04-25T12:39:00.002+03:00

عزيزي الزوج ...

احتفظ معك دائما بصورة لزوجتك ! ضعها في محفظتك وكلما مررت بضائقة أو مصيبة، أنظر إليها لتتذكر أن لديك مصيبة أكبر... !

Allah Akber

2008-03-20T17:31:00.001+02:00

اللهم صلي علي محمد وعلي ال محمد كما صليت علي ابراهيم وعلي ال ابرهيم في العالمين انك الحميد المجيد & ارسلها ل 10 خلال ساعه هتكون كسبت مليون صلاه علي الحبيب في صحيفتك باذن الله & ملحوظه & متكبرش دماغك وتقول مش فاضي دي مليون صلاه على حبيبك ...... ايوه اعمل كوبي وارسال مش صعبه ومش هتاخد وقت

Discover the new Windows Vista Learn more!

مصر دى مش أمى ..دى مرات أبويا

2008-02-23T10:45:00.003+02:00

طب حد يفهمنى مين بعد كده نقول له حب مصر ، ولازم نزرع الانتماء و حب البلد ، يا عم روووووح ده راجل خد كل حاجة فلوس بالعبييييط وكوسة ومصالح تربتييييت وحب الناس من قلوبهم بجد و مش عايزين منك حاجة،ملايين بتحبك وأب بيقول لابنه نفسى أشوفك زى الحضرى بيحب مصر بجد وهو واقف فى الجون بيدافع عن البلد مش عن الجوون، لاء و ايه يجيب فينا حتة جوووون بيوجع ،طب انا راجل مش فاهم حاجة حد يفهمنى ويوعينى مين فيكى يا بلد ممكن يحبك و ينتمى اليك الموظف الغلبان اللى مش بيحب شغلته ولاحياته ومخنوق فى عيشته؟،طب مين ولا مين ،ده زفت الطين ده معاه ملاييين الملاييين وبيشتغل شغلانة مفيش الذ من كده وعايش فى كل حتة يروحها يلاقى تسهيلات وحب مفيش بعد كده، يا ابن ال.....ده الناس تقريبا عمرها ما اجتمعت على حاجة من زمان ،كان وصل بيهم الامر ان الكل بيحب زفت الطين و فرقة مرات ابويا كلها ، تصدق انا فرحان فينا ، ايوه عشان طول عمرنا لما بندى بندى بلا حدود ولما بنحب بنحب و بس ،لازم بقه نفوق ،مفيش حب للابد مفيش انتماء الا للمصلحة ،يووه مصلحة مين ده احنا ع كده حنكره بعض أوى وحنخاف من بعض وح نشك فى وطنية بعض ، لا مسئولين بيحبوا باخلاص و لا مواطنين ناجحين بيحبوا البلد بجد ،طب و بعدين ، اللى عملوا زفت الطين ده اكبر بكتير من واحد بيدور ع فلوس ،ايوه لان ده معاااه كل حاجة ، وامتى طلع وهرب ؟ لما سافر الامارات و لم الدراهم و جت بقه ع حفلة المصريين الغلابة اللى ف الاستاد عشان ببلاش تقوم تخلع قبلها ، طب ليه فكرت فى اولادك اللى بتقول مسافر عشانهم ،ح تقعدهم فين عند مرات ابوك برضه ، ؟وياكلوا و يشربوا مع ولاد مرات ابوك ، لا يا اخويا العيال دول حيفوقوا بقه ومش يقعدوا معاهم االا اللى منهم ،ومش حيدوا حد تانى بهبل من غير حساب ،مش يضحكعلينا تانى لا بدمعتين ولا بمكالمة تليفون ،روح يا جدع انت داهية لا ترجعك تانى لا انت ولا مرات ابوك

تاكسى .. العيد

2007-12-15T14:33:00.000+02:00

كل سنة وانتم طيبين باقى ع العيد 3 أيام ،قلت يا واد شوف عربيتك فيها ايه احسن تعملها و تعطل ف ايام العيد ومش ح اعرف اصلحها ، المهز، سيبتها تتصلح و هوب شاورت ل تاكسى ، واول ما حطيت نفسى ف التاكس لقيت السواق رابط ايده اللى بيسوق بيها برباط ضاغط كتير أوى ، قلت الله خير يا رب حادثة بسيطة و بس ، لقيت السواق اشتغل لوحده ،ماتخافش يا حضرة انا باسوق كويس بس اعمل ايه من يومين وقعت ع ايدى حاطط عليها ميه دافية و ربطها و اشتغلت ع آخر اليوم وجعتنى اوى والعيال ف البيت صمموا يودونى المستشفى وهناك قال ايه شرخ كبيرولازم يجبسوها ، عملوا اللى عملوه و روحت ، امبارح كله قاعد بايدى المتجبسة و طبعا ما نزلتش اشتغل و صاحب التاكس طلع واحد تانى ، وانا قاعد ف البيت يا حضرة سمعت ام العيال بتكم العيال و تقول لهم اتلمى يا بت انتى و هى مفيش طلبات عيد ولا لحمة اللى جبناه وخلاص مش شايفين ابوك قاعد عن الشغل ومش عارفين حيشتغل امتى ؟؟ ،بينى وبينك يا بيه مجليش نوم وعيالى عايزين يعيدوا وياكلوا لحمة ما ده عيد اللحمة ولازم يحسوا بيه ،انا بصراحة قمت ع الفجر و جبت سكينة كبيرة و قعدت أقطع ف الجبس ده لما طلع عينى ودفيتها بشوية ميه سخنين و لفيتها بالرباط ده و تصدق استريحت قوى يا بيه ، قلت بس هنا يا أسطى انا كده وصلت انزل انا هنا ، وربنا يخليك لولادك ، ورفعت وشى للسما و قلت يا رب خليك مع الغلابة

الحلم الاول ....زبالة

2007-11-09T22:27:00.000+02:00

اعداد المصريين زادت ده صحيح ، مستخدمى التكنولوجى و خريجى مدارس اللغات و شهادات الجى سى , و الدى جى وخلافه زاد طبعا و طبعا الزبالة زادت نتيجة استهلاك اكتر من اعداد اكبر و اكبر ، طيب ازاى حتتلم فضلاتنا و زبالتنا دلوقتى ،طيب تعالوا نشوف ايه اللى بيحصل اليومين دول ، عامل النظافة اختفى، كل بيت يتصرف لوحده اللى عنده بواب يعدى ياخد الكيس الاسود و يرميه ف مكان بعيد عن البيت ده ، وده طبعا اكيد جنب بيت حد تانى كاتب ادام بيته من فضلك ممنوع القاء الزبالة هنا عشان عربية البلدية اتعودت تعدى عند المكان ده وتلاقى زبالة اربع او خمس بيوت ف المكان ده ، و عشان العربية دى ليس لها ميعاد محدد ، وعلشان الناس مش متعودة ع نظام ثابت فكل واحد بيرمى زبالة بيته وقت ما الكيس يتملى ع آخره و مالوش دعوة حيتشال امتى ، علشان كده تلاقى دايما يا عينى كل شارع فيه ع الاقل بيت او اتنين دايما قدامه زبالة طول اليوم ،السؤال دلوقت ينفع يكون ده نظام حياتنا ، اكيد لاء ، عشان كده كان لازم يكون حلمى الاول انى الاقى صندوق بلاستيك كبير بغطا امام كل بيت ( ومايتسرقش ) والاقى عربية الحى المخصصة للنظافة ف ميعاد ثابت كل يوم ( زى بالضبط باصات المدارس تلاقيها بتعدى كل يوم ع نفس الخطوط ف مواعيد ثابتة )،ايه ده، ده باين الحلم ده ممكن يتحقق ولا ايه ، المهز،العربية تعدى تاخد الاكياس السودا من غير ما تتفتح و تتحط ف العربية المخصصة للاكياس دى و تكون العربية دى مغطاه عشان العمال اللى عليها ما يمرضوش و عشان زبالتنا ما تترماش ف الشوارع تانى كلها و عشان الزباب مايدخلش بيوتنا ومعاه رسايل غضب من زبالتنا اننا ضحينا بيها و استغنينا عنها و طردناها من بيوتنا ، السؤال الحلم ده حيفضل حلم ف خيالى و بس ولا ممكن يتحقق و نشوفه حقيقة ، والاهم من كده نعمل احنا ايه عشان نحرك الحلم ده ، يارب يتحقق و انا عايش

باك تو سكووول

2007-10-16T23:56:00.001+02:00

عمو ... من فضلك ممكن تسمح أدخل جوه ؟ انا خلاص مش ف الطابور يا جماعة
لو سمحتم فيه غلطة م الفرن ح أقوله عليها
طيب يا سيتى اتفضلى ... سيبوها تعدى يا جماعة باين غلطة ف الحساب ولا حاجة
عمو .. عمو .. من فضلك انا اديت لحضرتك 2 جنيه و قلت لك عايزها ب 2 جنيه عيش فينو من الصغير العادى مش الفرنساوى الكبير لكن حضرتك بابا لما عد العيش قال لى ارجع لك عشان باقى العيش
باقى عيش ايه يا أمورة ورينى كده .. يا سلام ... ما العيش مضبوط بالعدد اهه انتى معاكى 10 رغيف بحالهم اهه
ايوه فعلا 20 رغيف من الفينو العادى ده ... الله هو كده مضبوط ؟؟؟
ايوه يا بنتى انتى كده عيشك مضبوط الرغيف ب 20 قرش .. اندهى لى بابا و انا افهمه
لا خلاص و النبى سيبه كده ، اصل لو عرف مش يرضى يودينى المدرسة تانى ... عينى عليك يا بابا يا حبيبى

اعلانات رمضانية

2007-09-23T00:35:00.000+02:00

البلد بتتحرك .... والغسيل رايح ع فيـــن

الغالى تمنه فيـــه

2007-09-07T00:57:00.001+02:00

طبعا الغالى تمنه فيه، وبما انا كلنا مفلسين عشان العيال عايزين حاجات المدارس و المدارس عايزة المصاريف ، وامهم عايزة لبس العيد للعيال عشان تلحق الحاجة الحلوة بدرى ، وطبعا حاجات رمضان من مكسرات و خلافه ، والمفروض انك تعمل حساب نصيب اخوانك من الصدقات و الزكاة اللى هو اهم حاجة ف الشهر الكريم ، و يا سلام بقه من كام عزومة ح تعملها ع الفطار عشان رمضان كريم يحب اللمة ، و دخلك هو هو بتاع الايام العادية بلا مفاجآت ... عشان كده انا قررت انا مش حأشترى الا الغالى بس عشان الغالى تمنه فيه ، و انا شايف ان الحاجة كلها اكازيونات و تخفيضات و أسعار رخيصة و لذلك قررت عدم شراء اى حاجة من اى حد ( من الآخر مش عارف أعمل حاجة ف كل الحاجات دى )

2007-09-06T23:31:00.000+03:00

أمى الغالية مع أخى العزيز فى الاراضى الحجازية لاداء عمرة أواخر شعبان
يارب أسالك قبول الدعاء و الرحمة على والدنا المرحوم باذنك يا رب و اللى يوافق غدا السابع من سبتمبر يوم ميلاده

شكر خاص للى لحقونى

2007-08-25T02:20:00.000+03:00

ايه فيه ، البلد زيها زى اى بلد تانية فيها الغنى و فها الفقير و فيها اللى بين البنين ، المشكلة ف الحقد اللى مالى قلوب الحاسدين واللى مش عايزين يتحركوا من مكانهم ، نصيحتى لهم جميعا لا تنتظروا المليان يكب ع الفاضى ، لأن المليان قريب اوى مش ح يكب الا من مكان واحد ميصحش اقوله

وآه......وآه.... يا ساكايار

2007-08-21T23:10:00.000+03:00

بص هى الصرخة وجعانى أوى

بس

انا متأكد ان ربنا بيحبك و ح يحرصك دايما ف اى مكان و مع اى حد

مع الســــــلامة يا غـــــالى

فوقى بقه يا ست دنيـا

2007-08-05T18:57:00.000+03:00

ايه يا ست دنيا انتى نسيتى نفسك ولا ايه ؟؟؟ لاء صحيح مالك فيه ايه ،تعالى نتكلم بصراحة ووضوح ،انتى لو مؤاخذة يعنى ف الكلمة تسوى ايه من غير ناس ياترى حيبقى لك قيمة من غير ناس ، ياترى حيكون شكلك ايه ،مين حيجيب سيرتك ، مين يطلب منك حاجة ، مين يجرى يتنطط لما يكون فرحان و يقول انك مش أد فرحته ، مين لما يبكى حيشكى لك همه ويقولك ليه يادنيا حظى فيكى قليل ، عشان كده عايزك تفوقى شويه
لازم تلمى نفسك حبة ووزعى شويه حنان ع خلق الله

بيل جيتــس

2007-07-20T03:39:00.001+03:00

لما بيل جيتس و رفاقه فكروا يغزو كل بيت و شركة و هيئة فى امريكا ، كان لازم يدخل للناس من اهتمامتهم و طبيعة شغلهم ، عشان كده عمل الاوفيس و تطبيقاته.

ولما عمل الصور و الشات و الذى منه دخل الوطن العربى من أوسع أبوابه .الله ينور عليك يا بيل يا ابن الخواجة جيتس

ادارة الادارة

2007-07-16T02:58:00.001+03:00

طيب يعنى ايه ع الصبح.. من أولها ؟

..لاء صحيح نفسى دايما ندور على أسباب النجاح زى ما احنا عندنا القدرة على صياغة 1000 سبب للفشل ، فعلا مهم جدا اى تجربة ناجحة نقعد نحلل ناجحة ليه زى ما فى حالة الفشل تلاقى الف لسان و لسان يعد لك اساب الفشل و كل سبب مختلف عن الى قبله ، زى ما نكون بنقى فرحانين ف الفشل ، اللى افهمه ان اللى عارف اسباب الفشل أوى كده يبقى اكيد ناجح مش كده ولا ايه !!!.

لكل عمل ادارة حتى وان كان شخص واحد فلابد من وجود الادارة ، ليس هذا هو المهم فالاهم ف رأيى كيف تقود هذه الادارة ، الادارة الناجحة فى رأيى ، وأرجو ان يكون يميل للصح هى التى تقوم على الاداء و ليس على النتائج ، ويكون التحليل هو السمة الغالبة على ملامح ادائها ، ليه ببننجح زى ليه ما بننجحش. يا جماعة قصة الادارة دى هى الامل فى نجاح البلد دى لو عايزين نبقى حاجة ، ده حتى ف اللعب لما نييجى نحاور الاهلوية و الزملكاوية الكل ف الاخر مقتنع تماما انها ف طريقة ادارة الادارة ،عشان كده لازم الناجحين يعرفوا و يعرفوا كل اللى حواليهم ازاى نجحوا

قال ايه الدنيا لسه بخير !!!! .. لاء انسى...

2007-07-13T13:17:00.001+03:00

كبر( ال) جى و روق ال( دى)

· عايز تبقى باشا طول ال 24 ساعة و بشهادة كل اللى تقابلهم فى كل مكان ؟؟؟

سهلة دى

خد نفسك و عيالك واطلع صيف لك يومين ف اى مكان ف مصر

حتشترى اى حاجة من اى حد حتة وانت بتصيف حتلاقى كل اللى ف المحل سماك الباشا

شوف طلبات الباشا ايه

شوف حساب الباشا كااام

ادى الباشا الباقى ( ده لو فيه اصلا )

· عايز تسمع قصص و حكايات ؟؟؟؟

دى كمان سهلة

اطلع السلم الساعة 3 صباحا و انت مروح بعد قضاء يوم بالمصيف

حتلاقى بنتين نازلين من بيتهم لسه، واحدة تقول للتانية و بصوت عالى ايه رأيك ف الحجاب بتاعى الصبح محجبة و دلوقتى زى ما انتى شايفة ( كلنا شايفين )

والتانية ترد تقولها اسكتـى الواد اللى تحتنا ف الشقة عمال يشاور لك عايزك ، قالت لها هو عايز ايه ما انا بايتة عنده ليلتين، اتفضل يا عمو ، ده انا ، أصل كنت امامهم ع السلم و الكلام ده كله بيتقال .

· عايز تشوف فيلم عربى محترم تطلع منه بحاجــة ؟؟؟؟

دى بقه اسهل حاجة خالص

ادخل فيلم ( مرجان أحمد مرجان )

كبر ال ( جى ) : كبر ال جمجمة

روق ال ( دى ) : روق ال دمــاغ

· أرجوك أوعى تشوف فيلم ( كركر) ..............

ده الفيلم اللى مش فيلم منه لله كل اللى شارك فى اى حتة فيه

مفيش عنــوان

2007-06-12T23:07:00.000+03:00

لما طارق المراسل الصحفى لقناة الجزيرة مات فى العراق بنيران قوات التحالف كان لازم نسميه طارق الشهيد ، ولما شفنا محمد الدرة بيموت امامنا ع شاشات التليفزيون بنيران اسرائيلية فى فلسطين المحتلة كلنا بكينا على أصغر شهيد ، طب حد يقول لى لو انا هناك دلوقتى و مت بنيران فلسطينية اما فتح او حماس حيسمونى برضه الشهـــــيد ؟؟؟؟؟؟

تعريف المصيبة

2007-06-08T11:53:00.000+03:00

أن يكون شعـار كل المصريين :

· ( لا تعـايرنى و لا أعايرك ، الهم طايلنى و طايلك )

· ( اللى بيتـه من أزاز مايحدفش الناس بالطوب )

أصــــل الحكــاية

2007-05-25T20:36:00.000+03:00

في قديم الزمان

حيث لم يكن على الأرض بشر بعد ...
كانت الفضائل والرذائل.. تطوف العالم معا ..
وتشعر بالملل الشديد ..
ذات يوم... وكحل لمشكلة الملل المستعصية .
اقترح الأبداع.. لعبة.. وأسماها الأستغماية.. أو الطميمة ..
أحب الجميع الفكرة .
وصرخ الجنون: أريد أن أبدأ.. أريد أن أبدأ ...
أنا من سيغمض عينيه.. ويبدأ العدّ .
وأنتم عليكم مباشرة الأختفاء ..
ثم أنه اتكأ بمرفقيه..على شجرة.. وبدأ ...
واحد... اثنين .. ثلاثة ..
وبدأت الفضائل والرذائل بالأختباء ..
وجدت الرقة مكانا لنفسها فوق القمر ..
وأخفت الخيانة نفسها في كومة زبالة .
وتلاشى الولع... بين الغيوم .
ومضى الشوق الى باطن الأرض ...
الكذب قال بصوت عال: سأخفي نفسي تحت الحجارة.. ثم توجه لقعر البحيرة ..
واستمر الجنون: تسعة وسبعون... ثمانون.... واحد وثمانون..
خلال ذلك أتمت كل الفضائل والرذائل تخفيها... ماعدا الحب ...
كعادته.. لم يكن صاحب قرار... وبالتالي لم يقرر أين يختفي ..
وهذا غير مفاجيء لأحد... فنحن نعلم كم هو صعب اخفاء الحب..
تابع الجنون: خمسة وتسعون....... سبعة وتسعون ....
وعندما وصل الجنون في تعداده الى : مائة
قفز الحب وسط أجمة من الورد.. واختفى بداخلها ..
فتح الجنون عينيه.. وبدأ البحث صائحا": أنا آت اليكم .... أنا آت اليكم ....
كان الكسل أول من أنكشف...لأنه لم يبذل أي جهد في إخفاء نفسه ..
ثم ظهرت الرقّة المختفية في القمر...
وبعدها.. خرج الكذب من قاع البحيرة مقطوع النفس ...
واشار على الشوق ان يرجع من باطن الأرض .
وجدهم الجنون جميعا".. واحدا بعد الآخر ....
ماعدا الحب .
كاد يصاب بالأحباط والبأس . في بحثه عن الحب... حين اقترب منه الحسد
وهمس في أذنه:
الحب مختف في شجيرة الورد .
التقط الجنون شوكة خشبية أشبه بالرمح.. وبدأ في طعن شجيرة الورد بشكل طائش ....
ولم يتوقف الا عندما سمع صوت بكاء يمزق القلوب ...
ظهر الحب.. وهو يحجب عينيه بيديه.. والدم يقطر من بين أصابعه ...
صاح الجنون نادما": يا الهي ماذا فعلت؟..
ماذا أفعل كي أصلح غلطتي بعد أن أفقدتك البصر ؟ ...
أجابه الحب: لن تستطيع إعادة النظر لي... لكن لازال هناك ماتستطيع
فعله لأجلي... كن دليلي ...
وهذا ماحصل من يومها.... يمضي الحب الأعمى... يقوده الجنون

( منقــولة )

قاتل ماقتلش حد

2007-05-16T23:01:00.000+03:00

الحب يقتل الوقت بسرعة شديدة
..والوقت يقتل الحب ببطء شديد

و كيكـــا ،،،،

آه يا نوم ..يا نوم .. يا نوم

2007-05-13T00:34:00.000+03:00

انا متجوز و عندى 3 عيال لسه نونو ،كل مل أفكر حأقدر أربيهم كويس ازاى ف الجو ده ،و اعلمهم ازاى و بكام ،و الكارثة بقه لما شوشو يلعب ف دماغى و يقول لى حتجيب لهم شقق ازاى عشان يتجوزوا ...؟ ألااقى نفسى طبعا تجرى من الاجابة ما هى مش لاقية اجابة ولا حل طبعا ، والاقى نفسى بتقول لنفسى وانت مالك طيب أقدر انت بس تأكلهم و تشربهم وبكره ده مش بتاعك ده بتاع ربنا مين عارف بكره فيه ايه...ده صحيح ونعمة بالله ..و هنا لعب شوشو تانى و قال لى بلاش ولادك بص كده ع شباب الايام عشان تطمن و يا ريتنى ما سمعت كلامه و بصيت .... يالهوى يالهوى ...لقيت شباب زى الفل فى كل حاجة و طبعا الفل لونه ابيض وريحته حلوة، وده بالضبط اللى لقيته كله يعرف يلبس كويس كله يعرف يتكلم كويس كله ماسك موبايل كويس جدا وكله زهقان قوى و معندوش امل ف اى حاجة و مش عايز اى حاجة و بيجرى ورا الشغل عشان مايقعدش ف البيت و ابوه و امه يزعلوا عليه كل هم الواد يجرى ورا اى اعلان و عمال يسحب ف فلوس و ياخد دورات كمبيوتر و لغات جايز اشتغل و اروح الشغل و آجى من الشغل و بس ع كده ...تصدق لما شفت الشباب ده و حاله ، حسدتهم عشان ولا واحد فيهم حيعيش مشكلتى لان مفيش جواز اصلا ، و بالتالى مفيش مشكلة ف مستقبل عياله، لاء و ايه اطمنت كمان ع الجيل الجديد و ان مشكلة زيادة السكان حتتحل من جذورها ، وساعتها ،كبس على النوم و قلت له اهلا يا راجل انت فين من زمان اوعى تتأخر على تانى احسن دماغى بتروح ف حتت غريبـــة.....ل

يخلق من الشبه 666

2007-05-06T23:50:00.000+03:00

من حوالى اربع خمس سنين كنت تحس ان كل البنات من سن ال18 سنة كلهم شكل واحد ،اه و الله صحيح، لبس شكل بعضه، الطرحة نفس الطريقة ،الجينز كله نفس الالوان ، طيب كمان نفس المشية و نفس الطول ، فعلا تحس انهم كلهم شبه بعض ، ماشى جايز هى دى الموضة وهى دى اثار الجيم و الرياضة ، لكن اللى مجننى ان طلع السنة دى شباب اولاد ف نفس السن ومش عارف افرق بينهم و بين نفس البنات ع فكرة كذا مرة انخدع فيهم خاصة من قفاهم ...

عشــوائية السلــوك

2007-04-27T03:22:00.000+03:00

و ده يطلع ايه ان شاء الله ؟ ؟ ؟

انك تشوف شاب لابس بنطلون جينز واقع من جسمه و بيجرر ع الارض ... عشوائية سلوك

انك تشوف بنت نازلة من التاكسى وطريقة ضبط هدومها انها تنزل وسط البنطلون لتحت وتضبط الحزام تحت اوى عشان تبدأ الاستعداد للمشى الراقص ... عشوائية سلوك

انك تلاقى واحد وقف بعربيته فجأة ف وسط الشارع و بيكلم واحد قاعد ف محله ولو اديته حتة كلاكس يرفع لك ايده لفوق و يزقع لك مستعجل ع ايه يا أخويا هو فيه ايــه ... عشوائية سلوك

انك تلاقى واحدة لابسة خمار كامل و تلاقيه ضيق و الجزمة كعب عاللى و رفيع و اى شادو كذا لون ع بعض ... عشوائية سلوك

انك واقف بعربيتك ف مكان ممنوع فيه الانتظار و تلاقى الأمين اللى المفروض انه أمين ييجى لك و ف ايده الدفتر و القلم و قال ايه بيقرا نمرة عربيتك و يبص ف وشك و هناك ابتسامة عريضة عشان تتشجع و تطلع الجنيه و ياخده و يقول مساء الفل يا بيه ... عشوائية سلوك

انك تلاقى مجموعة شباب روش ف عربية جديدة روشة و مشغل ال دى فى دى أعلى صوت ف الدنيا و انت واقف ف بلاكونة دور رابع تتجنن من الصوت ... عشوائية سلوك

انك تلاقى صاحب محل دقنه مترين و مشغل القرآن طول اليوم و فارش نص بضاعة محله أمام المحل وواخد الرصيف لحساب المحل ... عشوائية سلوك

انك تلاقى دينا الراقصة ف برنامج تليفزيونى بتتكلم ف الدين وتقنع فتيات جيل المستقبل بأفكارها و رأيها ف حياتها و ان ده عادى و ينتهى البرنامج ع كده بالموافقة ... عشوائية سلوك

انك تعيش ف بلد وانت نفسك تسيبها امبارح قبل النهارده ، أكيد حتنفض و تقضيها وخلاص ،تصحى العصر و تديها قعدة ع القهوة و سهرة شات ع النت ... عشوائية سلوك

انك تركب تاكسى و تلاقى السواق مشغل أغنية بحبك يا حمار و لو كلمته حتتهزق ... عشوائية سلوك

خللى بالك .... انك تقرأ كل الكلام ده و تقول عادى ... عشوائية سلوك

انك تسمع الأذان و كمان أقامة الصلاة و متصليش ... ده تطور التدهــــور ...

شحن واجب

2007-04-25T00:11:00.000+02:00

قلب بحاجة إلى شحن :

ذلك الـذي يصلي لمجرد أنه ورث الصلاة عن أبيه أو جــده
حـفظ الحركات التي يؤديها في الصلاة
دون أن يدري هل أدى الصلاة كـاملـة وعلى أحسن وجـه
و كم مرة سبح في الركوع والسجود
ودون أن يسأل لماذا صلاة الفجر ركعتان والعشاء أربــع

قلب بحاجة إلى شحن :

ذلك الـذي يقضي من عـمره 16 أو 20 سـنـة فـي حقل الـتعليم
لــيخرج في النهاية وفـي يـده " شهادة توظيف "
دون أن يعرف الـفرق بين النبي والرسول أو الــ" ض "و الــ" ظ "
أو لماذا تُكتب ( لـكن ) وليس ( لاكـن )
ودون أن يعرف لماذا ( 7 ÷ 3 ) عملية حسابية نتيجتها دائمًا خــاطئــة

قلب بحاجة إلى شحن :

ذلك الذي ينهض بـاكرًا فـي الصباح ليعمل في اليوم 12ســاعة
و 6 أيــاام فـي الأسبوع
من أجـل تحصيل الــراتب نهاية الشهر .. دون أن يدري لماذا
هو في هذه الوظيفة بالضبط
ومن أجــل مـاذا يـصرف كل هذا الجهد والـوقت !!

قلب بحاجة إلى شحن :

ذلك الـذي يـؤمن بأن إفـشاء الـسلام وإكــرام الضيف وعيادة المريض
وصلة الأرحام ومساعدة المحتــاج
ليست إلا جـزءًا من موروثات الـعادات والـتـقالـيد..
دون أن يسأل نفسه
لماذا يفعل كل تلك الأشياء دون مقابل

قلب بحاجة إلى شحن :

ذلـك الذي يــملأ بــطنه بالأكـل ويشبع شهوة جوعـه
دون أن يدري لماذا يأكل
.. ودون أن يتحرى على ما يدفعه من مــال للأكــل
هـو يعيش ليأكــل
ولا يـدري أن غيره يأكل لـيـعـيـش

قلب بحاجة إلى شحن :

ذلك الـذي يكمل " نصف دينه " مــن أجــل أن يقال له مثل من سبقه من زمـلائه
" أبــو فــلان" .. فهم لـيـسوا بأفضل منه ! ..
أو من أجـل الاستناد بـظهر بطاقة بنك من يـرتبط بـها .. متناسيًا أنه
أقسم بالله العظيم واعـدًا بحسن العشرة
وجميل الصحبة معها .. ودون أن يفهم لماذا الـزواج يـساوي نـصـف الــدين !!

قلب بحاجة إلى شحن :

ذلك الـذي يعـتقد أنه بمجـرد أن يمــسـك بقلم " كيبـورد " أصبـح شاعرًا مـشـهورًا
يهجو من يشاء أو كاتبًا مـرموقًا ينتقد من يشاء ..
دون أن يفطن لقوله تعالى" ما يلفظ من قول إلا لديه رقيب عتيد "
ودون أن يدري أنه ليس كل من تعلم حرفًا
أصبح عالمًا .. وأن ليس كل عالم يستطيع تأليف كتابًا ॥

منقـــــولة

حــــلم واحـــــــد

2007-04-24T15:03:00.000+02:00

يا سلام يا سلام .... انا ح اتجنن لاء ، انا اتجننت فعلا ، ما ينفعش يا جدعان كده احنا بنعرف نتجمع فعلا و بنكون ايد واحدة صحيح و بنخوف اى حد يشوفنا و اعدادنا مش بسيطة و بنعرف نكون اصحاب حلم واحد و بنتجمع على فكرة واحدة فى لحظة واحدة و بنكون كلنا بنحب بعض ساعتها مش بنضايق بعض أو نشتغل بعض أو حتى نشوف سلبيات بعض ، الله علينا مين غير ما حد يسخنا أو يحمسنا أو يشجعنا ،تلاقينا كلنا كده ايد واحدة و شخص واحد .و ساعتها مابتفرقش معانا مواعيد اللى بيصحى متأخر ح تلاقيه بدرى واللى وراه شغل و دايما مشغول مش ح يقدر يقول كده حتى مديرينه مش بيتكلموا يومها عن الشغل ، كله بيتكلم عن الحلم الواحد الله ع كده...كله ساعتها بيتغير و بيغير نفسه و بيضبط مواعيده كلها ع الحدث المهم و كله بينجح يكون على مستوى الموقف ، يعنى بننجح يا جماعة،،بس يا خسارة اللى بيشوف النجاح ده شــــــــــــاكيرا و فريق برشلونة، و ساعتها يكون النجاح ده لهم و مش لينا، يا خســــــــــــــااااااارة

ماشى ع صامولة و مسمار و ربك هو الستار

2007-04-22T23:42:00.000+02:00

لاء صحيح فيه مشكلة و مشكلة كبيرة كمان لما تمشى جوه البلد و تلاقى كل كام متر شوية عربيات واقفة و حواليها ناس بتتفرج ع العربيتين اللى عملوا حادثة و الاتنين بيتخانقوا و واحد منهم ماسك موبايل و يطلب النجدة اللى تجيله ف ساعتها وتتفرج بقه ع طريقتهم ف طلب رخص الاتنين قبل اى حاجة و تقول لهم بسرعة اركن انت وهو ع جنب و يمشوا الطريق و الناس فركش ...ساعتها الاتنين يبدأوا ف الندم ع الاتصال اصلا بيهم و خللى بالك كل اللى النجده ح تعملوا هو الاتصال اللاسلكى بادارته لتبيلغ المرور تمام الطريق شغال و الرخص معايا و ييجى ضابط المرور و هو قرفان لسه ادراة النجدة مبلغة ادارته اللى ندهوا عليه ف اللاسلكى بتاعه لانه هو الاقرب من الحادثة واول ما يوصل يدخل عليه امين النجدة ويقول له خلاص هما اتفقوا مين حيدفع لمين لان رخص الاتنين طلعت سليمة (طبعا الوضع كله بيختلف تمام لو حد رخصه مش سليمة حتى لو مش غلطان).

ع فكرة انا حكيت لك اللى بيحصل حوالى من 30 الى 40 مرة يوميا بنفس السيناريو خللى بالك كل ده بيحصل جوه البلد

تعال بقه للموضوع الكبير أوى اللى تاعبنى وهو بره البلد ع الطريق خللى بالك بيزيد ع اللى بييجوا دول عربية كمان و دى بقه اللى بتوجعنا كلنا وهى عربية الاسعاف و للاسف منذ عام تقريبا و العربية دى اعداد الحالات اللى بتقلب وفيات زادت اوى اوى اوى فوق الوصف يا ناس بالله عليكوا كل الناس تقول لكل الناس.... اصعب حاجة لما تعيش انت وتكون السبب فى موت انسان حتى ولو خطأ ...عمرك ما حتنسى هذا الموقف ....سترك يا رب

فيرجينيا هاى ..تك

2007-04-21T01:31:00.000+02:00

أظهرت نتائج التحقيقات الفيدرالية فى حادث اطلاق نار بالحرم الجامعى و الذى راح ضحيته اكثر من 32 طالب و طالبة ،ان مرتكب هذه الواقعة الشنعاء طالب من كوريا الجنوبية جاء مع اسرته الى الولايات المتحدة منذ اكثر من 15 عاما وانهم يتمتعون بالجنسية الامريكية وان لهم جميع حقوق المواطنين الامريكين ،تم احالة هذه النتائج للادارة الامريكية العليا و التى اتخذت اجراءات الرد المباشر و السريع تجاه اي محاولة عنف تحدث على اراضيها ، فاصدرت القرارات التالية:
1- توجيه ضربة عسكرية عنيفة ضد ايران
-2 توقيع اقسى العقوبات ضد سوريا (الوطن مقابل الغذاء)

-3 عدم الاعتراف بحكومة فلسطين الارهابية و اعتقال كل اعضائها
4- تقديم مكافأة مالية تقدر بمئات الملايين من الدولارات لكن من يرشد عن الارهابى الكبير حسن نصر الله
5- زيادة اعداد القوات الامريكية و البريطانية بالاراضى العراقية لضمان عدم حدوث ذلك ثانية
6- على بقية الدول العربية و الاسلامية التعاون الكامل مع دولة اسرائيل لضمان الامن و الامان للدولة العبرية.

NO COMMENT

2007-04-13T03:48:00.000+02:00

سبحان الله و بحمده ،سبحان الله العظيم

2007-04-13T03:13:00.000+02:00

كم في المقابر من يحسدونك على هذه الأيام والليالي التي تعيشها
يتمنون لوتسبيحة أواستغفار ينفعهم عند ربهم
أوسجدة تنير قبورهم أوصدقة تظلهم بين يدي الملك الجبار ..فقط تذكر.. ولا تضيع الفرصة التي بين يديك

ابليس قرر ترك مصر !!!! ل

2007-04-09T11:50:00.000+02:00

إبليس قرر يجهز شنطته ويرحل نهائي عن مصر.
الناس عرفوا الخبر فعملوا مظاهرة كبيرة وذهبوا إليه
ليقنعوه بالرجوع عن قراره....
فقالوا له : خليك معانا بلاش
تسيبنا....احنا بقينا كذابين ، غشاشين ‘ منافقين.. ورؤسائنا كمان بقوا
مجموعة مرتشين ولصوص .....حتلاقي فين أتباع احسن مننا؟
قال لهم : انتم ناس ناكرين للجميل .... الواحد منكم يجي لي لابس
جلابية مقطعة وشبشب زنوبة ويبوس ايدي علشان أعلمه ، مأكدبش خبر وأديله المفيد ...
بعد شوية يبقي غني وصاحب نفوذ وينتخبوه عضو مجلس شعب ..
..اروح له علشان أهنية
الاقيه قاعد في مكتبه ومعلق وراه برواز كبير
مكتوب فيه
(هذا من فضل ربي)

طب سؤال تانى مجننى

2007-04-02T00:49:00.000+02:00

هو فيه أحسن من الشخص المناسب ف المكان المناسب ف الوقت المناسب .....؟

أمال ليه حال الجامعة العربية كده ....؟

أقصد الجمعــة العربية

فيه ســؤال لسه بيزن علــى

2007-03-30T22:20:00.000+02:00

مش حيخلص من دماغى غير لما اقوله
ايه أهم انجاز عربى مفيد حصل ف آخر 5 سنين ؟؟؟
خلاص كده يا أنا ارتحت ؟ تبقه قابلنى لو حد عبرك باجابة

حبة حاجات عجبانى

2007-03-23T22:40:00.000+02:00

النجاح سلم لا تستطيع تسلقه ويداك في جيب
قد تنسى من شاركك الضحك ..لكن لا تنسى من شاركك البكاء
إن الناس لا يخططون من أجل الفشل ... ولكنهم يفشلون فقط في التخطيط
الابتسامة كلمة طيبة بغير حروف
الضربات القوية تهشم الزجاج فقط .. لكنها تصقل الحديد
تعلم قول لا أدري .. فإنك إن قلت لا أدري علموك حتى تدري.... وإن قلت أدري سألوك حتى لا تدري
لا تفكر في المفقود .. حتى لا تفقد الموجود
بقى شىء مهم ان هذه الكلمات منقولة

عايز تعرف انا حأكون اول واحد هناك ليه؟

2007-03-23T22:16:00.000+02:00

عشان اليافطة دى .. حاسس انها عشان كل اللى عندو عيال عايز يربيها

دستور يا أسيادنا

2007-03-23T03:22:00.001+02:00

ايه ده لاء من فضلكم انتوا فهمتوا غلط انا اقصد دستور يا اسيادنا يعنى زى العواف كده او احم احسن يكون حد كاشف راسه ولا حاجة ، ما اقصدش الدستور الكبير بتاع الناس الكمل اللى بتفهم ف السياسة و الحكم، آه انااحب كلامى ،و يتفهم صح الله يكرمكم
وعلى فكرة بالمناسبة انا يوم الاستفتاء انا لازم اروح اصل انا و انا بالف ف البلد اشتغل و اقضى حاجات يومى العادية لقيت شوية حاجات مهمة ،لقيت كل البلد يفط بتقول روح قول نعم و شكلها كده كده بخط الناس المهمين اه والله كلها قماش ابيض و مكتوبة بلون اخضر امال ايه حاكم انا افهمها وهى طايرة ايوة حاضر حاروح ما صحيح هو الدستور ده عبارة عن ايه ما هو كتاب كبير فيه كل عن البلد وموجود هناك بس هو يعنى انا ولا انت عندنا دستور ف البيت و ل ده ملك حد لاء طبعا ده بتاع الحكومة والناس اللى بتفهم و هم ادرى يزودا سطر يشيلوا صفحة اهو هم برضه اللى فاهمين المهم انا عايز اجيب عيش من الفرن اللى جنب لجنة الاستفتاء عشان العيش بتاعه حلو و اجيب شوية حاجات لزوم الغدا و الذى منه و بالمرة اعدى اشوف فاتورة التليفون كام ربنا يستر و تطلع حينة شوية عن بتاعة الكهربا اصلها طلعت كبيرة شوية الشهر اظاهر التكييف كان بيسخن استعداد للعمل ف الصيف.