و ده يطلع ايه ان شاء الله ؟ ؟ ؟
انك تشوف شاب لابس بنطلون جينز واقع من جسمه و بيجرر ع الارض ... عشوائية سلوك
انك تشوف بنت نازلة من التاكسى وطريقة ضبط هدومها انها تنزل وسط البنطلون لتحت وتضبط الحزام تحت اوى عشان تبدأ الاستعداد للمشى الراقص ... عشوائية سلوك
انك تلاقى واحد وقف بعربيته فجأة ف وسط الشارع و بيكلم واحد قاعد ف محله ولو اديته حتة كلاكس يرفع لك ايده لفوق و يزقع لك مستعجل ع ايه يا أخويا هو فيه ايــه ... عشوائية سلوك
انك تلاقى واحدة لابسة خمار كامل و تلاقيه ضيق و الجزمة كعب عاللى و رفيع و اى شادو كذا لون ع بعض ... عشوائية سلوك
انك واقف بعربيتك ف مكان ممنوع فيه الانتظار و تلاقى الأمين اللى المفروض انه أمين ييجى لك و ف ايده الدفتر و القلم و قال ايه بيقرا نمرة عربيتك و يبص ف وشك و هناك ابتسامة عريضة عشان تتشجع و تطلع الجنيه و ياخده و يقول مساء الفل يا بيه ... عشوائية سلوك
انك تلاقى مجموعة شباب روش ف عربية جديدة روشة و مشغل ال دى فى دى أعلى صوت ف الدنيا و انت واقف ف بلاكونة دور رابع تتجنن من الصوت ... عشوائية سلوك
انك تلاقى صاحب محل دقنه مترين و مشغل القرآن طول اليوم و فارش نص بضاعة محله أمام المحل وواخد الرصيف لحساب المحل ... عشوائية سلوك
انك تلاقى دينا الراقصة ف برنامج تليفزيونى بتتكلم ف الدين وتقنع فتيات جيل المستقبل بأفكارها و رأيها ف حياتها و ان ده عادى و ينتهى البرنامج ع كده بالموافقة ... عشوائية سلوك
انك تعيش ف بلد وانت نفسك تسيبها امبارح قبل النهارده ، أكيد حتنفض و تقضيها وخلاص ،تصحى العصر و تديها قعدة ع القهوة و سهرة شات ع النت ... عشوائية سلوك
انك تركب تاكسى و تلاقى السواق مشغل أغنية بحبك يا حمار و لو كلمته حتتهزق ... عشوائية سلوك
خللى بالك .... انك تقرأ كل الكلام ده و تقول عادى ... عشوائية سلوك
انك تسمع الأذان و كمان أقامة الصلاة و متصليش ... ده تطور التدهــــور ...
12 comments:
ياااااه يا باشا
ده انت اختصرت اوى ف الموضوع ده
حاجات كتييييير اوى عشوائيه سلوك
معتش حد عارف حاجه و كله بيخبط و زى ما تيجى تيجى برده عشواءيه سلوك
وعلى رأي المثل
دي عشوائية سلوك
عندك حق ... بس سميها نقص دين
ممكن أتطفل على هذه البلوجه بكمنت صغير ؟
: )
: )
مواضيع جميلة يا نيو إيميدج
محتاجين نراجع أفكارنا وتصرفاتنا ومنمشيش بشكل عشوائي
يمكن مش كل حاجه عايزه تعقيد أكتر من اللازم
لكن حسبة عقلانية بسيطة هتظبط الأمور وتخليها تمام
تحياتي
مايسترو وربنا
والقفلة في الجون
أكتر حاجة بتغيظني العربية والمحل وموقف الطريق دي ياااااااااااااااه
انما الآي شادووو عادي يعني
لما نشوف الشيخ يتاعنا هيقول ايه
عذرا للتأخير
وانت إيه اللي يخليك تبص للي لابسة خمار وتدقق في عينيها علشان تعرف إذا كانت حاطة آي شادو ولا لأ؟؟؟
ويا أخي إن ما استحملناش بعض يبقى هنعيش إزاي؟؟؟
واحد واقف بيكلم واحد في الطريق ... عااادي جدن ... ممكن حاجة ضرورية ... لف انت من شارع تاني لو مستعجل ... ولا وراك الديوان
أكيد عربيته أحلى من عربيتك ... بطلوا الحقد الطبقي ده بقى .... يا بااااااي
هوه لا مؤاخذة ما لقيتش غير مثال الأخ أبو دقن مترين ومشغل القرآن طول النهار وتضربه مثل ... لو هما فيهم عيووووب ... انتو بقى ؟؟؟؟ فين لحيتكم يا أساتذة
أنا شايف يا مستر ميينز...إن الأستاذ صاحب البوست جمع أمثلة كتيرة وأكيد كل الأمثلة دي موجودة في وسطنا ...وهوه بيتكلم على السلوك العشوائي مش بيتكلم على الدقووون بس يا حضرة ...يومك سعيد
ومين عرفك إنه من غير دقن؟؟؟
يا أخي الدعوة للدين عمرها ما تبقى بالطريقة دي
لا مؤاخذة يا ايميدجاوي اتدخلت ورديت بدالك ... بس لازم اللي يرد عليهم يبقى واحد منهم
فعلا انت عرفت تجمع كل عشوائيات السلوك الموجودة العشوانيه المختلطة بثقافة العنف و ثقافة الفقر ضيف بأه عليهم
أما تقول للناس تقف في طابور يقفوا ثانيتين و يتفشكلوا تاني و كل واحد يهجم عايز يجش الأول عشوائية سلوك
أما تكون سايق و تيجي عند التقاطع و تلاقيه واقف عشان كل واحد عايز يعدي بالعافيه و محدش عايز يصبر على خحد اما يعدي أو اللي في اقصى اليمين عايز يجي أقصى الشمال أو العكس عشوائية سلوك
أما يبقى حته فيها أكل ببلاش اوبن بوفيه و لا بيوزعوا حاجه و الناس بتزاحم و بتهجم و كل و احد عايز ياخد لنفسه و للجيران و تبص تلاقي مش كل الناس خدت في الأخر عشوائية سلوك
أحييييك على البست استمر
اولا بجد الموضوع جامد
بس هاج تعليقى عليه معلش شويه
انا دخله اوضح ان انا مش اللى رده قبل سكايار المره التانيه
فى ناس فكرت ان انا اللى رده
ياجماعه شوفوا الاسم كويس ميناس
غيرmeans
هناك فرق
وبعدين ازاى تتخيلوا انى ممكن ارد رد زى ده
وبعتذر تانى لنيو اميدج عشان معلقتش على الموضوع ودخلت ارد على اللى اتقالى
اعلق بقى بعد ما قرات الموضوع
صحيح المواقف اللى ذكرتها كلها بتحصل
بس كل عشوائيه فى سلوك بيكون نتيجه حاجه معينه
فكر معين
او اسلوب ونمط حياة
هو فى الاساس اسلوب عشوائى
مفيش حاجه بتنشأ من فراغ
انا مش بدافع عن اللى ذكرتهم فى المواقع
لان مش صح اننا ننقاد ورا اى سلوك عشوائى
بس المشكله بجد ان معظم الشباب بقى بيستسهل اوى
ويمشى ورا اى حاجه
ال عشان يحس ان ليه نمط واسلوب حايه خاص بيه
ومش الكل بينتبه ده صح ولا خطا
ياريت تكون وصلت الفكره
مدونتك مواضيعها محترمه واسألتها اللى فى البويتات موضوعيه جدا
كل المواضيع عجبتنى استمر وربنا يوفقك
انما بالنسبه لعشوائية سلوك فى كلمه كانت بتتقال عجبتنى على الرغم ان انا مش عاجبنى فيها الاهانه وهى اتباعنا لاسلوب القطيع .. يعنى بنعمل اى حاجه من غير مانفكر وفى توهان مستمر حاجه فعلا ملاحظاها
اولا باشكر كل اللى علقوا ع عشوائية السلوك ،و يا ميناس عايز اقول لك انا فاهم فكرتك بس عارفة المثل اللى بيقول الجواب بيتعرف من عنوانه ده بالضبط هنا لو دى سلوكيات جيل مهما ان كانت اسباب ده تفتكرى يطلع لك ايه،تخيلى كله منفض ل كله حتى منفض لنفســه.و عجبــى
Post a Comment